என்கவுண்டர்கள் தேவையா ? அத்து மீறல்கள் அனுமதிக்கப்பட வேண்டுமா ?

என்கவுண்டர்கள் தேவையா ?
அத்து மீறல்கள் அனுமதிக்கப்பட வேண்டுமா ?

வேளச்சேரியில் வியாழன் அதிகாலையில்
நிகழ்ந்த என்கவுண்டரில் 5 பேர் கொல்லப்பட்டது
பற்றி அறிவுஜீவிகள் பலர்  
கேள்விக்கணைகளை அள்ளி வீசுகின்றனர்.

இது சரியா ?
விசாரணை இல்லாமல் தண்டனை
கொடுக்க போலீசுக்கு யார் அதிகாரம் கொடுத்தது ?
மனித உயிருக்கு மதிப்பே இல்லையா ?
எது பெரிய குற்றம்?
கொள்ளையா? கொலையா ?

இந்து போன்ற பத்திரிகைகள் புத்திசாலிதனமான
கேள்விகளை – சாமர்த்தியமாக அடுத்தவர் முதுகில்
ஏறிக்கொண்டு கேட்கின்றன.
தொலைக்காட்சிகள் -சந்து கிடைத்தது என்று
உள்ளே புகுந்து  கடுகை எல்லாம் பூசணியாக்கி,
விஷயத்தை பூதாகாரமாக்கி, வதந்தித் தீனி
சமைத்துக் கொண்டிருக்கின்றன.

உடனடியாக சிபிஐ விசாரணை தேவை -

போலீஸ் மீது கொலை வழக்கு பதிவு செய்யப்பட்டு
விசாரணை நடத்தப்பட வேண்டும் ..

இப்படி எல்லாம் குரல் கொடுப்பது  யார் ?

மனித உரிமைக் காவலர்கள் -
human rights organisations -

எனப்படும்  அமைப்புகள் !

எங்கே இருக்கிறார்கள் இவர்கள் எல்லாம் ?

இவ்வளவு நாட்கள் என்ன செய்து கொண்டிருந்தார்கள்
இவர்கள் எல்லாம் ?

யாராவது, எங்கேயாவது,  பார்த்தது உண்டா
இவர்களை எல்லாம் ?

தனித்திருக்கும் வயதானவர்களை கழுத்தை அறுத்து
கொலை செய்து விட்டு கொள்ளைகள்
நிகழ்த்தப்படும்போது -

பள்ளி செல்லும் குழந்தைகளை கடத்திச்சென்று
பணம் பறிக்க முயற்சிகள் நடக்கும்போது -

பள்ளிச் சிறுமிகளைக் கடத்திச்சென்று வடக்கே
விபச்சார விடுதிகளில் விற்கும் செயல்கள் நிகழும்போது -

தெருவில் நடந்து செல்லும் பெண்களின் கழுத்தில்
செயினை பறித்துக்கொண்டு செல்லும் நிகழ்வுகளின்போது -

அரசியல்வாதிகளின் துணையுடன் பொறுக்கிகள்
அடாவடி செய்யும்போது -

அப்போதெல்லாம் இத்தகைய அமைப்புகள்
எங்கே போகின்றன ? ஏன் குரல் கொடுப்பதில்லை ?

சுட்டுக் கொல்லப்பட்டவர்கள் என்ன ஒன்றும்
அறியாத அப்பாவிப் பொது மக்களா ?

அத்தனை பேரும் கொள்ளைக்காரர்கள் தான்
என்பது எல்லாருக்கும் தெரியும். வங்கிகளில்
கொள்ளை அடிக்கும்போது -
எதிர்ப்பு இருந்திருந்தால் – கொலையும்
செய்திருப்பார்கள் என்பதும் தெரியும்.

7 துப்பாக்கிகள் இருந்தன என்றால் -
அதில் 3 டாய் துப்பாக்கியாமே என்கிறார்கள்.
ஏன் – ஒரு துப்பாக்கி இருந்தாலே போதாதா ?

எதற்கெடுத்தாலும் எதிர்ப்பு என்பது அபத்தம்.

காவல்துறையினர்
அத்துமீறியதாகவே இருக்கட்டுமே.
சில சமயங்களில் -
அத்துமீறல்களும் அவசியமாகின்றன.

அத்துமீறல் எதற்காக நடந்திருக்கிறது ?
பொது நலனுக்காகத் தானே ?
இத்தனை கேள்விகள் எழும் -
இத்தனை எதிர்ப்புகளையும்
எதிர்நோக்க வேன்டி இருக்கும் என்று தெரிந்தும்
காவல் துறை ஏன் அதைச் செய்தது ?

குற்ற நடைமுறை சட்டங்களின்
குறிக்கோள் என்ன ?

ஒன்று – குற்றம் செய்தவர்களை கண்டு பிடித்து,
வழக்கு தொடர்ந்து,
அவர்கள் செய்த குற்றத்திற்கான தண்டனையை
அனுபவிக்கச் செய்வது.

இரண்டு – மிகக்கடுமையான தண்டனைகளை
விதிப்பதன் மூலம் குற்றம் செய்யத் துணியும்
மற்றவர்களின் மனதில் அச்ச உணர்வை
உண்டு பண்ணி அவர்கள் குற்றச் செயல்களில்
ஈடுபடாமல் தடுப்பது.

இந்த என்கவுண்டர்களின் பின்னணி என்ன ?
எதிர்வரும் காலங்களில் எவரும் இத்தகைய
செயல்களில் ஈடுபட அஞ்ச வேண்டும்
என்பது தானே ?

சகட்டு மேனிக்கு கண்டன அறிக்கை விடுவதற்கு
முன்னால் இந்த அமைப்புகள் எல்லாம்
கொஞ்சம் யோசிக்க வேண்டும்.

இன்று நியாயமான காரணத்திற்காக அத்துமீறல்
நடந்திருந்தாலும்,  எதிர்காலத்தில் தவறான
காரணங்களுக்காகவும் இந்த அத்துமீறல்கள்
நிகழக்கூடுமே என்று அச்சப்பட்டால் - அது நியாயம்.

அதை வெளிப்படுத்த வேண்டிய விதத்தில்
வெளிப்படுத்த வேண்டும்.

அயோக்கியர்களுக்கு துணிச்சல் ஏற்படுவது எப்படி ?

எதற்கெடுத்தாலும், குறுக்கே சால்
போடும் அமைப்புகள் -
வழக்குகளை விரைவாக நடத்த முடியாமல்
வருடக்கணக்கில் இழுத்தடிக்கும் நடைமுறைகள் -
நீதிமன்றங்களால் தீர்ப்பு அளிக்கப்பட்டாலும் கூட,
அதை நிறைவேற்றாமல் இழுத்தடிப்பது.

மும்பை தீவிரவாத தாக்குதலில் பிடிபட்ட கசாப்
இயந்திரத் துப்பாக்கியுடன்  வெறிகொண்டு
அலைந்த காட்சியை வீடியோக்களில் பார்த்த
பின்னரும் அவன் கொலைகாரன் என்பதில்
யாருக்கு சந்தேகம் வரும் ?

இருந்தாலும், இன்னமும் மனித உரிமை
என்றும், சட்டவிதி முறைகள் என்றும் -
வருடக்கணக்காக அவனை உட்கார வைத்து,
மட்டன் பிரியானி போட்டு,
அவனைப் பாதுகாக்க கோடிக்கணக்கில்
தண்டச் செலவு செய்து கொண்டிருக்கிறோமே -

பாராளுமன்ற தாக்குதலில் ஈடுபட்ட அப்சல் குருவுக்கு
சுப்ரீம் கோர்ட் தூக்கு தண்டனை விதித்து இத்தனை
ஆண்டுகள் கடந்த பின்னரும் இன்னமும் நிறைவேற்றாமல்
வைத்திருக்கிறோமே -

ஏன் – சுதந்திர இந்தியாவில் -ஊழல் புரிந்த
அரசியல்வாதிகள் எத்தனை பேரைப் பார்க்கிறோம்.
யாருடைய வழக்காவது முடிந்து -
சிறை சென்றிருக்கிறார்களா ?
15 வருடம் 20 வருடம் ஆனாலும் வழக்குகள்
முடிவடைகின்றனவா ?

இதற்கெல்லாம் காரணம் என்ன ?

குற்றம் செய்பவரை  விரைவாக கண்டு பிடித்து,
வழக்கு தொடர காவல்துறைக்கு சுதந்திரமில்லை.

எப்படியாவது பிடித்து விட்டாலும்,
யாரை வைத்தாவது வெளியில் வந்து விடுகிறார்கள் !

நீதிமன்றங்களில்  வழக்குகளை விரைவாக நடத்தி,
குறிப்பிட்ட காலக்கெடுவுக்குள் முடிக்க
சட்டங்கள் இல்லை.

தப்பித்தவறி நீதிமன்றங்கள் தீர்ப்பு கொடுத்தாலும்,
அதை நிறைவேற்றாமல், அரசியல்வாதிகள்
குறுக்கிடுகிறார்கள்.

இந்த என்கவுண்டர் நிகழ்ந்த பிறகு நான்
பொதுமக்கள்  பலரிடம் பேசினேன்.
பொதுவாக அனைவரும் இதை வரவேற்கிறார்கள்.

என்ன -சிலருக்கு லேசான ஒரு உறுத்தல் இருக்கிறது.
ஒருவனையாவது உயிரோடு பிடித்து,
விவரங்களை, பின்னணியை அறிந்திருக்கலாமே என்று.
இந்தக் கோணத்தில் காவல்துறையினரும்
ஏற்கெனவே யோசித்திருப்பார்கள்,
அதற்கு வழி செய்திருப்பார்கள் என்று நம்புகிறேன்.

என்னைப் பொறுத்த வரையில் -
சென்னை போலீஸ்  கமிஷனர் J.K.திரிபாதி அவர்களின்
தலைமையிலான இந்த team க்கு என் மனமார்ந்த
வாழ்த்துக்களையும், பாராட்டுக்களையும்
தெரிவித்துக் கொள்ள விரும்புகிறேன்.
இந்த வலைத்தள நண்பர்களும்  இதையே  
விரும்புவார்கள் என்று
நம்புகிறேன். சரி தானே  நண்பர்களே ?

Congratulations to Chennai Police
Commissioner Mr.J.K.Tripathy
and his Team.

பின்குறிப்பு -  ஒரு வேடிக்கை – என்கவுண்டர் நடந்து
ஏறக்குறைய 48 மணி நேரம் ஆகி விட்டது.  ஆனால் -
தமிழகத்தின் அரசியல் கட்சித்தலைவர்கள் யாருமே -
I repeat – யாருமே இது பற்றி வாயே திறக்கவில்லை!
காரணம் என்னவாக இருக்கும்  ?-
கொஞ்சம் யோசித்து – எனக்கும் சொல்லுங்களேன்.