இப்படி ஒரு கோயில் …. !!!

இப்படி  ஒரு கோயில் …. !!!

கீழே தந்திருக்கும் அறிவிப்புப் பலகைகளை
முதலில் படித்து விடுங்கள்.
விவரங்கள் அதற்குப்  பின்னர் !

(இந்த புகைப்படத்தில் எழுத்துக்கள்  தெளிவாக
தெரியாததால் -மீண்டும் கீழே  தட்டெழுத்தில்
தருகிறேன். )

நோக்கம் ஓராண்டாக இருந்தால் –
பூக்களை  வளர்ப்போம்.

நோக்கம் பத்தாண்டாக இருந்தால் –
மரங்களை வளர்ப்போம்.

நோக்கம் முடிவில்லாமல் இருந்தால் –
மனித குலத்தை வளர்ப்போம்.

பொதுவாக – ஆலயங்களின் நோக்கம் –பக்தி,
ஆன்மிக வளர்ச்சி தொடர்புடையதாகவே இருக்கும்.
சில ஆலயங்கள் கல்விப்பணியிலும் கவனம்
செலுத்துகின்றன.

ஆனால் – சற்று வித்தியாசமாகவும், பாராட்டத்தக்க
வழிமுறைகளைக் கொண்டதாகவும்  ஒரு ஆலயம் –
அது பற்றிய சில விவரங்கள் கீழே –

சமூக சேவையை முக்கியமாக
மேற் கொண்டிருக்கிறது இந்த ஆலயம் –

கண் தானம், ரத்த தானம்,
உடல் உறுப்புகள் தானம்,
(இறப்பிற்கு பிந்தைய) உடல் தானம்
இவற்றை ஊக்குவிக்கும் விதங்களில் செயல்படுகிறது.
இவை தொடர்பான அறிவிப்பு பலகைகள் தான் மேலே
காணப்படுபவை.

இங்கு சுத்தம், ஒழுங்குமுறை  இரண்டும்
கடுமையாக வலியுறுத்தப்படுகிறது.

உள்ளே நுழையும் முன்னரே, காலணிகள் பெற்றுக்
கொள்ளப்பட்டு டோக்கன் கொடுக்கப்படுகிறது.
(இலவசம் )
கால், கைகளை சுத்தம் செய்து கொண்டு உள்ளே
போக – 3 நல்ல தண்ணீர்க் குழாய்கள்.

எந்த இடத்திலும், எந்தவித உண்டியலும் கிடையாது.
ஊழியர்கள், அர்ச்சகர் உட்பட
யாருக்கும் பணம் கொடுக்கக் கூடாது.
தீபாராதனை தட்டிலும் பணம் போடக்கூடாது.
(இது குறித்தும் அங்கங்கே அறிவிப்பு பலகைகள் !)

கற்பூரம் கொளுத்துவது தடை செய்யப்பட்டுள்ளது.
ஆலய வளாகத்தில் மவுனம் அவசியம்.

செல்போன் பயன்படுத்தக் கூடாது. மீறி
செல்போன் அழைப்பு மணி ஒலித்தால் –
ஆலய ஊழியர்கள் செல்போனை வாங்கி
வைத்துக் கொண்டு விடுவார்கள். 24 மணி நேரம்
கழித்தே செல்போன் திரும்ப கொடுக்கப்படும்.
இது பற்றிய அறிவிப்பும் நுழை வாயிலிலேயே !

ஆலயம் முழுவதும் மணம் பரப்பும்
அருமையான மலர்ச்செடிகள்.
அருமையான  வாசகங்களைக் கொண்டு ஏகப்பட்ட
கல்வெட்டுக்கள். (பெற்ற தாயின் முக்கியத்துவத்தையும்,
கல்வி கற்றுத் தரும் ஆசிரியருக்கு காட்ட வேண்டிய
மரியாதை குறித்தும், சமூகக் கடமைகள் குறித்தும்
வலியுறுத்தி – இதில் இரண்டை நான் ஏற்கெனவே
இந்த தளத்தில் போட்டிருக்கிறேன் – சமயம் வரும்போது
இன்னும் சிலவற்றையும் போடுகிறேன் )

இந்தியா முழுவதும் உள்ள புண்ணியஸ்தலங்களிலிருந்து,
ஆறுகளிலிருந்து – எடுத்து வரப்பட்ட 1008 கற்கள்
இங்கு பதிக்கப்பட்டிருக்கின்றன. அந்த இடங்கள் பற்றிய
தகவலும் வைக்கப்பட்டிருக்கிறது.

விரும்பும் யாருக்கும், இங்கு  பிராணாயாமம்,
யோகா – தேவாரம், திருவாசகம்
(இலவசமாக) கற்றுத் தரப்படுகிறது.

உட்கார்ந்து மௌனமாக தியானிக்க அருமையான
ஒரு தியான மண்டபம்.

(நான் எப்போது திருச்சி சென்றாலும் இங்கு சென்று
ஒரு மணி நேரம் அமைதியாக அமர்ந்து விட்டு
வரத் தவறுவதில்லை !)

இதில் மிக முக்கியமான விஷயம் என்னவென்றால் –
இது முற்றிலும் தனியாரால் நிர்வகிக்கப்படும்,
ஒரு கோயில். ஆனால் பொதுமக்கள் எல்லாரும்
அனுமதிக்கப்படுகிறார்கள்.

ஒரு முறை சென்று வந்தால் –
ஊருக்கு ஒரு கோயில் இப்படி இருந்தால் எவ்வளவு
நன்றாக இருக்கும் என்று உங்களை அவசியம்
எண்ண வைக்கும் –

திருச்சிக்குப் போகும்போது அவசியம் சென்று வாருங்கள் –
திருச்சி கண்டோன்மெண்ட்டில், கோர்ட் வளாகத்தின்
அருகே உள்ள  –  சுவாமி ஐயப்பன் கோயில் !
இதன் முகப்பில் காணப்படும்  வாசகம் –

                         ” RELIGION  UNITES – NOT DIVIDES “

பின்குறிப்பு –

ஒவ்வொரு ஊரிலும் தேர்ந்தெடுத்து,
ஒரே ஒரு கோயிலை மட்டுமாவது
இவ்வாறு பராமரிக்கலாம்.
ஆர்வம் வேண்டும் !
ஆன்மிக நோக்கமும், சமூகப் பார்வையும் உள்ளவர்கள்
ஒருங்கிணைந்து முயற்சி செய்ய வேண்டும் !